Çmimet e naftës u rritën ndjeshëm të enjten, më 30 prill, në Azi, pas raportimeve se ushtria amerikane po përgatit plane të reja për veprime të mundshme në luftën kundër Iranit, për të cilat do të informojnë Presidentin e SHBA-së Donald Trump.
Sipas portalit Axios, Komanda Qendrore e SHBA-së ka zhvilluar një plan për një seri sulmesh të shkurtra dhe të fuqishme ndaj objektivave iraniane me qëllim thyerjen e bllokadës së negociatave me Teheranin, shkruan BBC.
Një plan tjetër përqendrohet në kapjen e një pjese të Ngushticës strategjike të Hormuzit për të rihapur transportin detar tregtar, i cili mund të përfshijë trupa tokësore.
Pas publikimit të raportit, nafta e papërpunuar Brent u rrit me gati shtatë përqind në më shumë se 126 dollarë për fuçi, niveli më i lartë që nga pushtimi rus i Ukrainës në vitin 2022.
Nafta e papërpunuar amerikane WTI u rrit me 2.3 përqind në rreth 109 dollarë për fuçi.
Tregjet e energjisë ishin tashmë nën presion ndërsa bisedimet e paqes ngecën dhe Ngushtica kyçe e Hormuzit mbeti e mbyllur. Irani kërcënoi të sulmonte anijet pas sulmeve ajrore SHBA-Izrael, ndërsa Uashingtoni po shqyrton një bllokadë të zgjatur të porteve iraniane.
BBC raportoi se drejtuesit e energjisë u takuan me Trump të martën, më 28 prill, për të diskutuar zbutjen e ndikimit të luftës tek konsumatorët amerikanë, duke shtuar shqetësimet e tregut në lidhje me ndërprerjet e zgjatura të furnizimit.
“Pyetja e madhe është se sa gjatë mund t’i rezistojë administrata presionit ekonomik”, tha Will Walker-Arnott, menaxher investimesh në Raymond James, duke paralajmëruar për ndikimin inflacionist të rritjes së çmimeve të naftës. /tesheshi.com/